A concelleira do Partido Popular en Santiago de Compostela, Yolanda Otero, reclamou este mércores unha intervención urxente no lavadoiro e na fonte de Aradas, na parroquia da Peregrina, polo seu estado de “abandono”. A edil denunciou que ambos elementos, considerados tradicionais no patrimonio do rural compostelán, atópanse inundados pola maleza e a sucidade, o que, ao seu xuízo, evidencia unha falta de mantemento por parte do goberno local.
A representante popular cualificou o lugar como “un espazo tradicional de socialización” que sofre unha “total desatención”, con “eivas visibles na súa conservación”. Asemade, acusou ao executivo que lidera Goretti Sanmartín de desatender de forma sistemática as fontes e lavadoiros das parroquias, convertendo o caso de Aradas nun exemplo máis dunha problemática que afecta, segundo dixo, ao conxunto do rural compostelán.
Para Otero, a conservación do patrimonio tradicional debería ser unha prioridade na política municipal: “Estes elementos arquitectónicos teñen un valor patrimonial e histórico que non pode ser ignorado”, apuntou, engadindo que a súa situación actual “é unha mostra máis da incapacidade do goberno nacionalista de manter o patrimonio público”.
Na súa intervención, tamén fixo referencia á percepción de falta de limpeza na cidade, afirmando que as queixas da veciñanza aumentaron “considerablemente” nos últimos meses. “A sucidade estase a converter en protagonista na capital de Galicia”, declarou, vinculando esta situación ao que cualificou como “inacción, pasividade e desleixo” do executivo local.
A concelleira do PP asegurou que esta realidade está a xerar un malestar crecente entre a cidadanía e criticou que os problemas de xestión e organización do goberno local “repercuten negativamente na veciñanza”, que, ao seu xuízo, “ten dereito a gozar dos espazos públicos en condicións dignas e saudables”.
Finalmente, Otero instou ao goberno municipal a actuar “sen escusas”, subliñando que a limpeza e mantemento de espazos públicos debería ser unha prioridade política para “evitar a degradación” e garantir o benestar da cidadanía.
