A Xunta de Goberno Local do Concello de Ames aprobou a licitación das obras de mellora da seguridade viaria na parroquia de Covas, un proxecto que conta cun investimento de 128.415,69 euros e que se financia a través do POS+ Adicional 2/2024. A intervención principal consistirá na creación dunha nova senda peonil de 465 metros entre A Igrexa e O Lombao, unha actuación que se suma á xa executada previamente para conectar Covas co núcleo urbano de Bertamiráns.
O concelleiro de Obras e Servizos Básicos, Gustavo Nieto, destacou que esta nova intervención reforza o compromiso do Concello coas infraestruturas do rural. Segundo explicou, a obra permitirá “mellorar a seguridade viaria da zona, garantindo un espazo adecuado para o tránsito peonil e reforzando a accesibilidade no núcleo”.
A mellora da seguridade viaria en Covas é unha das catro actuacións incluídas na primeira fase do POS+ Adicional 2024, xunto á pavimentación de viarios en Castro de Ortoño e Biduído de Arriba, e a creación dunha senda peonil entre A Ponte Maceira e Carballo, en Trasmonte. O orzamento total destas intervencións ascende a 731.866,86 euros.
O plan contempla a construción dunha cuneta transitable na marxe dereita da estrada cun ancho medio de 1,80 metros, aínda que nos últimos 55 metros da vía o espazo dispoñible reducirá esta medida a 1 metro.
