O Concello de Ames presentou este martes na Escola Infantil Municipal O Bosque o conto “Os Bolechas: A Carballeira dos Trasnos”, unha nova historia protagonizada polos coñecidos personaxes creados por Pepe Carreiro. O relato está ambientado na Carballeira dos Trasgos de Ventín e pretende fomentar o coñecemento deste espazo natural entre a infancia, así como potenciar o seu uso como área de encontro e lecer para as familias.
O acto contou coa presenza do alcalde de Ames, Blas García, quen estivo acompañado polo concelleiro de Xestión do Medio Natural e Atención ao Rural, Javier Antelo, a concelleira de Educación, Carmen Porto, e a técnica da Aula da Natureza, Patricia Reboreda.
O conto presenta unha nova aventura dos Bolechas, que nesta ocasión viaxan ata a Carballeira dos Trasnos para escoller os seus disfraces de Entroido. Durante a súa visita, descobren a fauna e a flora do espazo e deciden inspirarse nos animais do bosque para crear os seus disfraces. O relato conclúe cun xantar na carballeira, recordando a tradición de empregar estes espazos naturais como lugares de encontro e convivencia.
O concelleiro de Medio Natural, Javier Antelo, subliñou que este proxecto busca dar visibilidade á Carballeira dos Trasnos e fomentar o seu uso entre a veciñanza. “Queremos que a xente vexa este espazo como un lugar propio para reunirse e desfrutar da natureza”, explicou.
Pola súa banda, a técnica da Aula da Natureza, Patricia Reboreda, destacou a importancia de usar personaxes recoñecidos como os Bolechas para achegar este tipo de contidos á infancia dun xeito ameno e atractivo. “A nosa idea é que a carballeira volva ser un espazo habitual para as familias, como sucedía antes, onde poidan pasar o día, merendar e xogar”, sinalou.
O Concello de Ames colaborou coa editorial Bolanda e co ilustrador Pepe Carreiro para dar forma a este proxecto. “Desde o principio viron moi clara a idea e souberon como trasladala á historia dos Bolechas”, explicou Reboreda. Ademais, destacou que a decisión de relacionar a fauna local cos disfraces de Entroido foi un acerto, xa que os animais son un elemento moi atractivo para os nenos.
