O paso do temporal Herminia deixou unha fin de semana complicada no municipio de Brión, onde as intensas chuvias e os fortes refachos de vento puxeron a proba os recursos municipais. Grazas á actuación coordinada entre o GES de Brión, o servizo municipal de obras e Protección Civil, baixo a dirección do alcalde, Pablo Lago, e o concelleiro de Obras, José Antonio Vidal, conseguiuse minimizar os danos en varios puntos críticos do concello.

Segundo explicou José Antonio Vidal, as intervencións comezaron o sábado con colocación de barreiras nas zonas máis vulnerables a asolagamentos, como as aldeas do Cabo, O Rial, Estrar, A Torre e Liñares. “Un dos puntos máis críticos foi a aldea do Cabo, que historicamente sofre inundacións por estar a un nivel inferior ao cauce do río. Nesta ocasión, conseguimos evitar que as vivendas resultasen afectadas como ocorrera hai unhas semanas”, sinalou Vidal.

O domingo o persoal municipal centrouse na limpeza de maleza e ramas caídas nos cauces do río, especialmente na ponte de Liñares, co obxectivo de facilitar o paso da auga. Ao mesmo tempo, traballouse na retirada de elementos caídos nos viarios e na limpeza de cunetas para previr acumulacións de auga en lugares como o Rial e as reixas de abastecemento. Estas tarefas continuaron durante a mañá deste luns.

O alcalde, Pablo Lago, agradeceu o esforzo do equipo municipal durante os días máis duros do temporal. “Sabemos que non fomos capaces de chegar a todos os núcleos e vivendas afectadas debido ás extremas condicións meteorolóxicas, pero estivemos ao lado dos veciños en todo momento e seguiremos traballando para mitigar os efectos deixados polo Herminia”, declarou.

PROBLEMAS CO SUBMINISTRO ELÉCTRICO

Ademais dos problemas provocados polas inundacións, varios núcleos como Boaventura, A Torre e Brans de Arriba quedaron sen subministro eléctrico dende a fin de semana. O Concello puxo en coñecemento de Naturgy a situación, solicitando unha intervención urxente. Segundo indicaron desde a empresa, a avaría débese a un problema nunha liña de media tensión. “Pedimos que actúen coa máxima celeridade para que o subministro poida ser restablecido canto antes”, explicou o concelleiro de Obras.