A Asociación de Pacientes e Usuarios do CHUS celebrará o próximo mércores unha xornada pública de debate titulada ‘As listas de espera. Asistencia demorada, asistencia denegada’. O encontro terá lugar na Biblioteca Pública Ánxel Casal ás 19:00 horas, e contará coa participación de varios relatores vinculados á asociación, todos eles pacientes e usuarios do sistema sanitario público.
A xornada estará moderada por Fernando Abraldes, economista e presidente da asociación, que estará acompañado por Carme Pazos, profesora de lingua galega; Xaime López, técnico da Administración Xeral, e Aida Castro, fisioterapeuta. Os ponentes analizarán as problemáticas relacionadas coas listas de espera no Servizo Galego de Saúde e denunciarán a falta de transparencia nos datos facilitados de forma oficial.
Segundo a Asociación de Pacientes, as listas de espera constitúen un instrumento esencial para regular a demanda de atención especializada e garantir os principios de equidade e rendición de contas. Non obstante, denuncian que os datos publicados polo Sergas son “parciais e incompletos“, xa que se basean en medias de días de espera, un indicador que consideran pouco representativo da realidade vivida polos pacientes.
Así pois, o colectivo denuncia datos insuficientes, xa que aseguran que non se ofrece información completa sobre os tempos de espera agrupados por número de días, ademais de omisións, non incluíndo as segundas e posteriores consultas nin os pacientes que rexeitan atención en centros privados concertados.
Demandan ademais axendas dinámicas, xa que desde 2023, a implantación deste sistema xera inseguridade xurídica, xa que “as axendas aparecen pechadas e os pacientes descoñecen cando serán atendidos”, indican dende a Asociación.
Durante o debate, abordarase o marco legal que regula os tempos máximos de espera e a opacidade que, segundo os organizadores, rodea esta cuestión. Ademais, poranse de manifesto casos concretos de vulneracións dos dereitos recoñecidos aos pacientes, evidenciando os efectos desta situación na atención sanitaria.
