O Ateneo de Santiago enviou este mércores unha carta á alcaldesa de Santiago de Compostela para reiterar a solicitude de reposición da placa conmemorativa dedicada ao compositor José Castro “Chané”, desaparecida tras unhas obras realizadas no edificio da súa casa natal, situado na Rúa dos Pitelos.
A placa, unha peza modernista realizada en mármore polo escultor compostelán Santiago Bonome, foi unha das primeiras creacións do artista antes do seu traslado a París. Segundo o Ateneo, a perda desta obra non só supón un esquecemento na memoria dun dos compositores máis relevantes da cidade, senón tamén un menoscabo ao recoñecemento do patrimonio cultural de Santiago.
A Xunta Directiva do Ateneo, presidida por Francisco Candela, subliña na misiva que desde o ano 2016 veñen solicitando, sen éxito, a recuperación da placa mediante diversos escritos e encontros con responsables municipais.
Na carta, a entidade cultural insta á actual Alcaldía a tomar as medidas necesarias para restaurar a homenaxe a José Castro “Chané” e preservar o legado artístico de Santiago. “Trátase dun acto de xustiza histórica que contribúe a recoñecer a relevancia dun dos composteláns máis ilustres”, destacaron desde o Ateneo.
O Ateneo confía en que esta petición, que consideran fundamental para a memoria cultural da cidade, sexa atendida coa dilixencia que merece. A reposición da placa non só restablecería o tributo a Chané, senón que tamén permitiría recuperar unha parte importante do patrimonio artístico e histórico de Compostela.
