A Policía Nacional traballa coa hipótese de que drogodependentes estarían detrás dos últimos roubos ocorridos en diferentes locais de zonas de Santiago de Compostela como Galeras ou Santa Marta. Así o sinalou este xoves nunha entrevista na Cadena Ser recollida por Europa Press a subdelegada do Goberno na Coruña, María Rivas.
“Determinados tipos de hábitos de consumo e necesidades rápidas de obter diñeiro para adquirir droga provocan que en momentos puntuais poida producirse un incremento neste tipo de roubos para a adquisición de drogas”, explicou. En todo caso, Rivas defendeu que a capital galega é unha cidade segura, pero recoñeceu que cando “en pouco tempo se producen varios intentos de roubo ou roubos” os cidadáns senten “que algo está a pasar”. “A obrigación que temos desde a administración é dar unha resposta rápida, que é a que se produciu”, aseverou a subdelegada.
