En 2024, Santiago de Compostela acadou as 2.338 horas de sol, o segundo rexistro máis alto deste século, só superado polas cifras de 2017, segundo o ‘Resumo meteorolóxico do ano 2024’ elaborado polo Observatorio Astronómico Ramón María Aller da USC. Este ano caracterizouse tamén pola elevada chuvia recollida, que superou os 2.000 litros por metro cadrado, e por fenómenos meteorolóxicos destacados como o temporal Kirk.
As horas de sol rexistradas en Compostela durante 2024 colocan este ano como un dos máis solleiros do século. Maio, agosto e xullo foron os meses con máis insolación, alcanzando 292, 278 e 272 horas respectivamente. Por outra banda, xaneiro, novembro e decembro foron os menos luminosos, con 106, 83 e 119 horas de sol.
En canto á chuvia, Santiago volveu superar os 2.000 litros por metro cadrado, unha cifra que non se alcanzara entre 2015 e 2022. En 2024 rexistráronse 2.058,9 litros/m², lixeiramente por riba da media das últimas décadas (1.800 l/m²). Os meses máis húmidos foron outubro (391,8 l/m²) e febreiro (313,1 l/m²). Ademais, os días con maior precipitación foron o 8 de outubro, con 101,5 l/m², e o 8 de febreiro, con 93,3 l/m².
TEMPERATURAS SUAVES
As temperaturas mantivéronse suaves ao longo do ano, cunha máxima de 33,4 graos compartida polos días 29 de xullo e 10 de agosto, e unha mínima de -1,3 graos o 20 de xaneiro. As máximas superiores a 30 graos rexistráronse en só 7 días, mentres que as mínimas negativas foron anecdóticas no casco urbano.
Entre os fenómenos máis salientables destaca o temporal Kirk, ocorrido entre o 8 e o 9 de outubro, que provocou ventos de 50-60 km/h no Campus Sur e a caída de numerosas árbores. Tamén cómpre mencionar o refacho de 68 km/h rexistrado o 24 de novembro e a intensa treboada da noite do 30 de novembro ao 1 de decembro.
CLIMA CARACTERÍSTICO DA CAPITAL GALEGA
Os datos confirman que Compostela mantén o seu clima característico, cunha combinación de días solleiros, precipitacións frecuentes e temperaturas moderadas. Estas condicións, segundo o Observatorio Ramón María Aller, seguen sendo un reflexo da dinámica climática propia da cidade.
