O consello de goberno da Universidade de Santiago de Compostela (USC) aprobou por unanimidade os orzamentos para 2025 que ascenderán a 328,34 millóns de euros, unha cifra que os sitúa como os maiores da historia da institución e que supoñen un incremento 4,42% con respecto ao exercicio económico anterior.
Segundo informou a USC, as contas deberán ser aprobadas definitivamente polo consello social. Estes orzamentos representan igualmente un incremento de preto de 96 millóns de euros con respecto aos de 2018, primeiro exercicio económico do mandato de Antonio López como reitor da universidade.
Noutra orde de asuntos, o consello de goberno aprobou a oferta de prazas de novo ingreso nos títulos de grao, máster e doutoramento da USC para o próximo curso. Así, a oferta total de grao contempla 4.668 prazas e outras 136 para os programas de simultaneidade de graos. Ademais a oferta dos máster ascenderá a 1.859 prazas e en programas de doutoramento a 865.
