Dúas persoas resultaron feridas este luns tras producirse unha colisión con tres vehículos implicados na estrada N-550, ao seu paso por Santiago de Compostela.
Segundo trasladou o 112 Galicia, foi un particular quen, pasadas as 07.00 horas, alertou á central de emerxencias deste sinistro no quilómetro 50 da N-550.
Con esta información, os operadores do 112 solicitaron a intervención de Urxencias Sanitarias de Galicia-061, dos Bombeiros de Santiago, da Garda Civil de Tráfico e dos servizos de mantemento da estrada.
Unha vez no lugar, os bombeiros confirmaron que un implicado permanecía atrapado no seu coche, polo que procederon coas tarefas de excarceración.
Finalmente, dúas persoas foron trasladadas, unha delas ao Complexo Hospitalario Universitario de Santiago (CHUS) e outra ao Hospital Rosaleda.
