O investigador compostelán Miguel Fernández de Sanmamed, especialista en inmunoterapia e membro do Cancer Center Clínica Universidade de Navarra (CCUN), volve estar recoñecido entre os científicos máis citados do mundo, segundo a lista anual Highly Cited Researchers elaborada por Clarivate Analytics. Este recoñecemento sitúa a Fernández de Sanmamed entre os científicos con maior impacto nas súas áreas de traballo, sendo un dos 104 investigadores que representan a institucións españolas nesta prestixiosa clasificación.
Formado inicialmente en Medicina pola Universidade de Santiago de Compostela (USC), Fernández de Sanmamed completou a súa especialización en Oncoloxía Médica no Hospital Universitario Central de Asturias e máis tarde, en inmunobioloxía, na Universidade de Yale, onde tamén é profesor. Na súa traxectoria, destaca como investigador principal de máis de 30 ensaios clínicos e de numerosos proxectos financiados en convocatorias competitivas. A súa labor científica reflíctese en máis de 100 artigos publicados.
O investigador tamén forma parte do equipo da Cima Universidade de Navarra, onde lidera o grupo de Onco-Inmunoloxía Aplicada e Traslacional, centrado en tratamentos avanzados para o cancro de pulmón e outros tumores. Recentemente, concluíu a súa participación no Leaders Generation Programme da Sociedade Europea de Oncoloxía Médica (ESMO), un programa dirixido a un selecto grupo de 15 oncólogos europeos, tras o que se integrou no equipo de investigación traslacional do centro.
A lista Highly Cited Researchers, elaborada por Clarivate, recolle este ano un total de 6.636 científicos de 59 países, baseándose en datos do índice Web of Science. Esta clasificación inclúe investigadores que destacan pola súa “influencia significativa e ampla no seu campo de investigación” e reflicte a calidade e impacto dos seus traballos nas respectivas áreas científicas.
