O Servizo Galego de Saúde (Sergas) iniciou as obras de mellora da área de espera de oncoloxía no Hospital Clínico de Santiago de Compostela, co obxectivo de humanizar este espazo.
Tal como informou a Xunta nun comunicado, os traballos durarán un tres meses e medio e suporán un investimento autonómico de case 721.800 euros. Ademais, o Sergas tamén formalizou a contratación do mobiliario para equipar a nova sala de espera, por un importe que rolda os 140.000 euros.
A actuación consistirá no acondicionamento da terraza do hospital santiagués, cuxa superficie supera os 300 metros cadrados. Así, o deseño prevé o peche da terraza para a súa climatización con acabados en madeira, mantendo as vistas ao Monte de Moas.
“A obra responde á necesidade de mellorar as condicións da sala de espera do servizo de oncoloxía do hospital, xa que os tratamentos implican encadear varias consultas e a preparación de fármacos específicos para cada paciente, polo que a súa estancia pode prolongarse varias horas”, subliñou o Goberno galego.
