O Museo Colexiata de Sar de Santiago de Compostela vén de poñer en marcha o proxecto MuSar dixital, unha proposta de divulgación que permitirá acceder en liña a contidos sobre a arte e a historia deste emblemático monumento. Como primeira actividade, o proxecto ofrece unha reconstrución virtual en 3D da igrexa tal como era no século XIII, momento en que se completaron as súas obras.
A recreación dixital, dispoñible na páxina web musar.gal, foi realizada polo experto en modelado Alejandro Vázquez Durán a partir dun proceso de investigación dirixido polo historiador Victoriano Nodar. Este traballo permite aos usuarios coñecer detalles destacados da igrexa, como a súa fachada oeste orixinal cos tres rosetóns e a ausencia de arbotantes, elementos que se engadiron en épocas posteriores. Tamén se aprecia a estrutura do interior sen as bóvedas actuais e a presenza dun falso triforio sobre as arquerías que separan as naves.
O proxecto MuSar dixital é posible grazas ao apoio da Consellería de Cultura, Lingua e Xuventude da Xunta de Galicia a través dunha convocatoria de axudas para centros museísticos e dun contrato de investigación entre o Arcebispado de Santiago de Compostela e a Universidade de Vigo.