A Sección Fiscal e de Fronteiras da Garda Civil do Aeroporto Rosalía de Castro-Santiago de Compostela investiga a tres homes como presuntos autores dun delito de furto cometido en varios establecementos situados na zona restrinxida de seguridade da terminal compostelá.
Segundo informou o Instituto Armado, os feitos producíronse cando os axentes sorprenderon os tres pasaxeiros dun voo con destino a Madrid mentres furtaban distintos artigos en comercios do recinto aeroportuario.
Os investigadores explican que os homes empregaban o coñecido ‘método da matrioshka’, consistente en acceder á terminal sen equipaxe de man, subtraer unha maleta pequena nunha das tendas e utilizala para agochar no seu interior outros produtos de elevado valor e tamaño decrecente, como mochilas, billeteiras, perfumes e cremas faciais.
Durante a acción, dous dos implicados distraían o persoal dos establecementos interesándose por distintos artigos, mentres o terceiro aproveitaba para realizar as subtraccións.
A Garda Civil procedeu a abrir investigación aos tres homes como presuntos autores dun delito de furto e recuperou todos os efectos sustraídos, que foron posteriormente devoltos aos seus lexítimos propietarios.
