A circulación ferroviaria entre Santiago de Compostela e Ordes foi retomada esta mañá despois de ser interrompida pouco despois das 10 da mañá debido á presenza do corpo sen vida dunha persoa nas vías do tren na rúa do Agro dos Mozos, no barrio de San Lázaro, segundo informou o administrador de infraestruturas ferroviarias Adif a través das súas canles oficiais.
O aviso público emitiuse arredor das 10:52, momento no que se comunicou que a incidencia afectaba especificamente aos trens que realizan o traxecto entre Santiago e A Coruña, tanto de media distancia como de proximidade. Pola súa banda, o 112 recibiu aviso da presenza do cadáver arredor das 10:10 horas. Ao lugar trasladáronse as forzas de seguridade e a xuíza de garda para realizar o levantamento do cadáver.
Fontes de Adif indicaron que o servizo fora suspendido de maneira puntual mentres se investigaban as circunstancias do suceso e se realizaban os traballos necesarios na vía. Por agora, non transcenderon máis detalles sobre a persoa implicada nin sobre a previsión de restablecemento da circulación.
Polo momento, os viaxeiros detidos na Coruña e Santiago foron trasladados en autobús.
