A Policía Nacional investiga un intento de roubo con butrón nunha sucursal do BBVA situada no barrio compostelán de Conxo, logo de que polo menos dúas persoas accedesen ao interior da oficina bancaria, pero abandonasen o lugar ao seren sorprendidas por dous traballadores.
Segundo fontes coñecedoras dos feitos, o asalto tivo lugar esta mesma mañá, antes da apertura ao público, na oficina situada na Avenida de Ferrol. Os autores do intento de roubo entraron pola noite a través do portal do edificio, practicando un buraco na parede para acceder ao interior das instalacións bancarias.
Con todo, o plan viuse frustrado cando, xa de mañá, o director da sucursal e outro empregado chegaron ao local. Ao decatarse da súa presenza, os presuntos autores fuxiron inmediatamente, sen tempo para levar a cabo o roubo.
No lugar desprazáronse de inmediato varias patrullas da Policía Nacional e da Policía Local, así como efectivos da Policía Científica, que recolleu indicios e mostras no interior da oficina para tratar de identificar aos implicados.
O xulgado competente decretou o segredo das actuacións, polo que, por agora, non transcenderon máis detalles sobre os avances da investigación nin se confirmaron detencións. O suceso xerou inquietude entre os veciños da zona, que foron testemuñas da chegada dos corpos policiais e do dispositivo montado ao redor da entidade.
