O portavoz do Grupo Municipal Socialista, Gumersindo Guinarte, instou o Goberno local a avanzar na definición do novo modelo de xestión de Fontes do Sar e Santa Isabel e a trasladar á Corporación os estudos realizados para preparar a futura licitación. Tal e como trasladou o PSOE en nota de prensa, Guinarte advertiu de que Fontes do Sar e Santa Isabel continúan funcionando cun contrato de xestión “caducado” que, segundo afirmou, “non permite realizar os investimentos que os usuarios demandan”, desde “mellores instalacións, salas de adestramento máis modernas e mellor equipadas” ata a incorporación de “novas actividades”.
Esta situación, sinalou o socialista, impide abordar retos de futuro como “valorar un novo complexo deportivo en Santa Marta dotado de piscina ou estudar a ampliación da lámina de auga de Santa Isabel”. Neste sentido, o portavoz socialista lembrou que o Goberno municipal formalizou en marzo un contrato de asesoramento para analizar a mellor fórmula de xestión e preparar a nova licitación, pero advertiu de que “os estudos iniciais deberían estar rematados” e que, a día de hoxe, “non teñen coñecemento deles”. Por iso, Guinarte reclamou ao Goberno municipal que “dea o impulso necesario á definición do novo modelo de xestión das instalacións deportivas” e que “non prolongue eternamente esta situación”, co obxectivo de ofrecer á cidadanía unhas instalacións deportivas “modernas e adaptadas ás necesidades actuais”.
