A Universidade de Santiago de Compostela (USC) publicou este luns a proclamación definitiva de Rosa Crujeiras como reitora da institución, un paso que formaliza a súa vitoria electoral e a sitúa xa á fronte da universidade compostelá, aínda que o acto oficial de investidura non se celebrará ata o próximo 10 de abril. Deste xeito, a catedrática convértese na primeira muller que dirixirá a USC nos seus 531 anos de historia, despois de impoñerse nas eleccións celebradas o pasado marzo cun 61,65 % do voto ponderado na segunda volta.
A cerimonia de investidura terá lugar o venres 10 de abril ás 11.30 horas no Salón Nobre do Colexio de Fonseca, en Santiago de Compostela, nun acto que simbolizará o inicio dunha nova etapa para a institución académica. Crujeiras xa partía como a candidatura máis respaldada tras a primeira volta das eleccións, na que lograra o 41 % do voto ponderado. Na segunda rolda, celebrada o 11 de marzo, ampliou esa vantaxe e impúxose á tamén catedrática Maite Flores, profesora de Óptica.
A nova reitora conta cun perfil fortemente vinculado á universidade compostelá e ao ámbito científico. É catedrática de Estatística e Investigación Operativa no Departamento de Estatística, Análise Matemática e Optimización, e desenvolveu toda a súa traxectoria académica entre a docencia, a investigación e a xestión universitaria. Licenciada en Matemáticas en 2001, obtivo posteriormente o Diploma de Estudos Avanzados en 2003 e o doutoramento en Estatística e Investigación Operativa en 2007, todos eles pola propia USC. A súa formación internacional completouse cunha etapa como investigadora posdoutoral na Universidade Católica de Lovaina, en Bélxica.
Ao longo da súa carreira, colaborou con persoal investigador de ámbitos moi diversos, entre eles a ecoloxía, a xeografía, a enxeñaría química, a lingüística, a economía ou a informática, o que reforza un perfil marcado pola interdisciplinariedade e pola conexión entre áreas de coñecemento. No ámbito docente, impartiu clases en centros moi distintos da USC, como as facultades de Matemáticas, Bioloxía, Enfermaría e Filoloxía, así como na Escola Técnica Superior de Enxeñaría, en estudos de grao, mestrado e doutoramento.
Ademais, coordinou o doutoramento interuniversitario en Estatística e Investigación Operativa e forma parte do Comité Académico do programa de doutoramento en Estatística da Universidade Sapienza, en Italia. A súa traxectoria na xestión universitaria tamén é ampla. Foi secretaria académica do Instituto de Matemáticas entre 2010 e 2013, e posteriormente vicedecana da Facultade de Matemáticas ata xaneiro de 2015. Ese mesmo ano incorporouse ao Vicerreitorado de Comunicación e Coordinación, con competencias en materia de calidade, e máis tarde asumiu responsabilidades como vicerreitora.
Xa en setembro de 2021 deu o salto á dirección científica do Centro de Investigación e Tecnoloxía Matemática de Galicia (CITMAga), cargo que ocupou ata decembro de 2025. Coa súa proclamación definitiva, a USC pecha o proceso electoral e abre unha nova etapa cun nome chamado a quedar xa inscrito na súa historia: o de Rosa Crujeiras, a primeira reitora dunha universidade centenaria que nunca antes estivera dirixida por unha muller.
