A Universidade de Santiago de Compostela anunciou este luns que un equipo internacional de investigadores coordinado pola científica Rebeca García Fandiño desenvolverá un proxecto destinado a mellorar o diagnóstico do covid persistente. O estudo terá unha duración de 18 meses e contará cun financiamento de 315.000 euros concedido pola Schmidt Initiative for Long Covid. Segundo explicou a universidade, o obxectivo do proxecto é perfeccionar os métodos que permiten distinguir entre pacientes con covid persistente e persoas que xa se recuperaron completamente da infección.
UN DIAGNÓSTICO BASEADO EN SÍNTOMAS
Na actualidade, o diagnóstico do covid persistente segue sendo complexo. A enfermidade afecta aproximadamente entre o 10 % e o 15 % das persoas que superaron unha infección por coronavirus, pero a súa identificación baséase fundamentalmente na avaliación de síntomas. Entre os máis frecuentes figuran a fatiga crónica ou a intolerancia ao esforzo, aínda que, segundo sinalan os investigadores, non existen probas moleculares obxectivas que permitan confirmar a enfermidade ou medir con precisión a súa gravidade biolóxica. O novo proxecto busca avanzar na identificación de marcadores científicos que permitan unha diagnose máis fiable e precisa.
INVESTIGACIÓN DENDE O CIQUS
A universidade tamén destacou a “consolidada traxectoria científica” da institución neste ámbito de investigación. Nos últimos anos, membros do Centro Singular de Investigación en Química Biolóxica e Materiais Moleculares publicaron catro artigos científicos en revistas internacionais centrados no estudo do covid persistente. Estes traballos permitiron demostrar que a heteroxeneidade da enfermidade non se organiza en subtipos pechados, senón que se distribúe nun continuo de gravidade biolóxica, un resultado que abre novas vías para comprender mellor esta patoloxía e avanzar no seu diagnóstico.
