Na mañá deste martes, ás 5:00 horas, a demanda eléctrica a nivel nacional recuperouse ao 92,09%, alcanzando os 18.563 megawatts (MW), segundo os últimos datos de Rede Eléctrica. Este proceso de recuperación, que comezou na tarde do día anterior en algúns puntos de Lugo e Ourense, avanzou gradualmente ao longo da noite e madrugada, logrando restablecerse por completo en boa parte da comunidade galega.
En cidades coma Ferrol ou Pontevedra, a subministración eléctrica quedou restablecida pasadas as 4:30 horas, mentres que en Santiago de Compostela fontes municipais confirmaron que a recuperación tivo lugar arredor das 6:00 horas.
A nivel estatal, Rede Eléctrica informou que o 100% das subestacións da rede de transporte xa se atopan energizadas, co que se avanza de maneira significativa cara á total normalización do sistema eléctrico. Segundo o Ministerio para a Transición Ecolóxica e Reto Demográfico, o restablecemento das subministracións afecta ás 680 subestacións que compoñen a rede de transportes.
O presidente do Goberno, Pedro Sánchez, expresou que “será unha noite longa” mentres se restablece por completo o servizo eléctrico en toda a península. Sánchez visitou a sede de Rede Eléctrica acompañado das vicepresidentas María Jesús Montero e Sara Aagesen, así como do ministro de Transformación Dixital e Función Pública, Óscar López, para facer seguimento da situación derivada do apagón enerxético que afectou a España durante varias horas.
