O novo carril bici de Santiago que conecta a Estación Intermodal con San Caetano permitirá tanto ás persoas que se despracen en bicicleta como ás persoas con mobilidade reducida ir desde un punto a outro en 12 minutos aproximadamente.
Esta nova senda peonil e ciclista de 3,3 quilómetros, enmarcada nun proxecto máis amplo de 11 quilómetros que conectará Santiago con Milladoiro, foi inaugurada este sábado nun acto polo conselleiro de Presidencia, Xustiza e Deportes, Diego Calvo; e a conselleira de Vivenda e Planificación de Infraestruturas, María Martínez Allegue.
Respecto desta nova vía, a conselleira destacou que “coloca a Santiago á altura” doutras cidades europeas a “nivel de mobilidade sustentable” como “Ámsterdam ou Róterdam”. Do mesmo xeito, resaltou que esta iniciativa converte á capital galega nunha cidade “máis humana” á vez que “incita e convida á socialización”.
SANTIAGO – MILLADOIRO
O proxecto de mobilidade ao que pertence a vía inaugurada este sábado plantexa unir Milladoiro coa Estación Intermodal, San Caetano e o Complexo Hospitalario Universitario de Santiago (Chus) para este ano.
Así, a conselleira destacou que este proxecto permitirá á cidadanía “ir ao traballo en Santiago andando desde Milladoiro”, mediante unha vía que cumpre con “todos” os parámetros de deseño, continuidade e seguridade”, ademais de “limitación dependente, un ancho suficiente e un pavimento transitable”.
Ademais, subliñou que, grazas ao “plan de sendas que está a desenvolver o Goberno autonómico”, Galicia foi recoñecida pola Unión Europea con “o premio á excelencia á seguridade viaria”.
