O sindicato estudantil Erguer vén de convocar unha asemblea aberta do estudantado da Facultade de Dereito da USC para este mércores 29 de abril ás 12:00, no despacho de estudantes situado no segundo andar do centro. A convocatoria prodúcese tras a aprobación dos novos horarios do grao na última Xunta de Facultade.
Segundo trasladou a organización, o cambio supón a substitución do actual modelo de clases de 1 hora e 15 minutos por outro baseado en dúas sesións consecutivas de 50 minutos da mesma materia, cun descanso intermedio de 10 minutos. Esta modificación aplicaríase no vindeiro curso académico.
Dende Erguer sinalan que o estudantado expresou o seu desacordo coa proposta dende o momento da súa publicación, tanto nas aulas como a través de enquisas realizadas entre o alumnado. Porén, indican que a medida foi finalmente aprobada grazas á maioría acadada polos votos do profesorado e da representación institucional na Facultade.
O sindicato denuncia unha “falta de representación” do alumnado neste proceso de decisión e cualifica a situación de “inxustiza”, ao considerar que non se tivo en conta a opinión maioritaria das estudantes.
