O Concello de Santiago de Compostela puxo en marcha a licitación do contrato de xestión da rede de centros socioculturais por un período de dous anos con posibilidade de prórroga por outros dous e un orzamento base de arredor de 3,4 millóns de euros. O concelleiro de Centros Socioculturais, Xan Duro, explicou que o novo expediente incorpora melloras organizativas e laborais e supón “un 24% máis de investimento que a licitación de 2021”, o que, dixo, “permitirá destinar preto de 400.000 euros adicionais por ano á rede”. “Teríame gustado iniciar o procedemento antes, pero traballamos en pregos complexos para ofrecer o mellor servizo á veciñanza e máximas garantías ao persoal”, afirmou.
A proposta reduce de catro a tres os lotes do contrato para simplificar a xestión. O lote 1 (Atención e Información ao Público) reforza o punto de entrada dos centros e prevé máis de 19.000 horas anuais de atención, 4.000 máis que no contrato anterior. Este incremento permitirá unificar horarios e abrir polas mañás en barrios que o demandaban, como Romaño e Vite. Os centros de Maruxa e Coralia (Casco Histórico), Aurelio Aguirre (Conxo), Santa Marta, José Saramago (Vite), San Xoán, Romaño, As Fontiñas, xunto coa Casa das Asociacións de Cornes e Agustín Bueno (Castiñeiriño), funcionarán de luns a venres de 09:00 a 14:00 e de 16:30 a 21:30, e os sábados de 10:00 a 14:00; en San Xoán, Santa Marta e Maruxa Coralia engádese tamén a franxa de 17:00 a 21:00 os sábados pola tarde. “Buscamos axustar mellor os horarios ás dinámicas de cada barrio”, indicou Duro.
O lote 2 céntrase na Biblioteca Municipal José Saramago, cun mínimo de 10.600 horas anuais para xestión bibliotecaria, préstamo intercentros e programas de animación á lectura. O concelleiro salientou que a biblioteca conta con máis de 6.000 persoas usuarias con carné e preto de 14.000 préstamos rexistrados, e mantén 19 grupos entre clubes de lectura, escritura e dinamización infantil e xuvenil. O prego inclúe a creación dunha web específica e a xestión das redes sociais do servizo, ademais do novo premio José Saramago de relato curto. “Queremos seguir avanzando na digitalización para mellorar a atención aos lectores e lectoras”, apuntou.
O lote 3 (Dinamización e Mediación Sociocultural) integra a antiga área de Animación e o bloque de Novas Tecnoloxías —neste contrato unificados— para facer a oferta “máis atractiva” ás empresas. A programación fixa contempla un programa de xogo e lecer con 6.000 horas anuais, clubes de tempo libre para persoas maiores (1.500 horas) e club mozo (1.500 horas), ademais de dinamización dixital e novas tecnoloxías con 8.000 horas anuais, unha das actividades “de maior demanda”, especialmente entre a poboación maior. A oferta completarase con actividades ordinarias arredor de eixos como cultura e arte, memoria e patrimonio, natureza e sustentabilidade e benestar e saúde, así como actividades estacionais (Entroido, Semana Santa, Verán e Nadal) por 2.000 horas anuais, e unha bolsa de 3.500 horas para accións non regulares ao longo do ano.
No plano laboral, os pregos recollen cláusulas para favorecer a estabilidade: calquera ampliación de horas deberá priorizar o persoal xa subrogado, co obxectivo de concentrar xornadas e avanzar cara a contratos máis amplos. “Confiamos en mellorar as condicións e dar resposta ás distintas casuísticas do servizo”, sostivo o edil.
O anuncio de licitación publicarase e abrirase un prazo de 35 días naturais para a presentación de ofertas. Duro lembrou a complexidade do contrato, que abrangue 43 centros e un volume elevado de horas e actividades, con adaptación de horarios e coordinación de públicos diversos. Sobre as incidencias dos primeiros días de curso nalgúns espazos, como Santa Marta, indicou que se requiriron explicacións á empresa e que se tratou de episodios “mínimos”, coa previsión de que a programación quede normalizada esta semana. “Agora que o expediente bota a andar, agardamos resolver no menor prazo posible, cumprindo a lei, para reforzar unha rede da que nos sentimos orgullosos”, concluíu.
