A subdelegada do Goberno na Coruña, María Rivas, certificou recentemente en Augardentes de Galicia a calidade do sector galego, tras acadar a firma o recoñecemento como mellor bebida espirituosa de España polo Ministerio de Agricultura, Pesca e Alimentación. María Rivas felicitou á empresa desde as súas instalacións en Vedra, que visitou acompañada do alcalde de Vedra, Carlos Martínez, e de Miguel Ángel Gómez, xerente da empresa.
María Rivas eloxiou o bo traballo da empresa, que puido comprobar durante a visita. Non en van, Augardentes de Galicia foi galardoada polo seu arraigo local, uso de materias primas tradicionais, esforzo en comercialización e exportación, e investimento e aposta sen dúbidas pola investigación e o desenvolvemento do seu modelo de negocio e produción; segundo o fallo do xurado deste premio.
Seguindo o exemplo de Augardentes de Galicia, a subdelegada animou a todo o sector a impulsar os seus negocios a través dos fondos do Plan de Recuperación, Transformación e Resiliencia, e máis concretamente a través do Perte Agroalimentario, “a través do que se reafirma co sector o compromiso concreto do Goberno, que estivo ao seu carón nos momentos máis duros da pandemia ou da guerra de Ucraína e que quere seguir estándoo para impulsar o seu futuro”.
Ao respecto deste plan de axudas e préstamos, María Rivas lembrou que o Goberno apostou polo sector en Galicia ao achegar máis de 14 millóns de euros ás súas empresas transformadoras e innovadoras. Ademais, indicou que está en marcha unha nova convocatoria dotada con 300 millóns de euros, co obxectivo de que as empresas podan seguir a fortalecerse, avancen na dixitalización dos seus procesos produtivos e poidan situarse á vangarda do sector.
PREMIOS ALIMENTOS DE ESPAÑA
Os Premios Alimentos de España buscan promover e estimular aos diferentes elementos da cadea alimentaria, recoñecendo o esforzo na comercialización, innovación e desenvolvemento rural a través da sostibilidade e da elaboración de produtos de calidade. No caso de Augardentes de Galicia, a través do seu produto Augardente Vedra do Ulla, o premio foi concedido ex aequo xunto a pacharán navarro Besarana Etiqueta Negra.
Augardentes de Galicia, S.A. nace en 1992 coa intención de elaborar destilados e licores, apostando desde o principio pola calidade, o emprego de materias primas autóctonas e a innovación para preservar a arte da destilación en Galicia, incorporando no proceso de destilación auga do Río Ulla. Estes valores e accións levárona ata o galardón que acaban de recibir.
