A Xunta insistiu en que o proxecto de vertedoiro de residuos de Niveiro nunha antiga canteira en Val do Dubra está aínda en proceso de tramitación, pendente de resolver dous procedementos que aínda non saíron a información pública. Así o manifestou o director xeral de Planificación Enerxética e Minas, Pablo Fernández Vila, en resposta a unha pregunta formulada na Comisión 2ª do Parlamento galego este xoves pola deputada do PSdeG Patricia Iglesias, que advertiu do impacto do proxecto sobre a poboación e a actividade económica na zona.
Na súa resposta, o representante da Xunta incidiu en que é “unha temeridade” anticipar o resultado dos procedementos dos expedientes de autorización do proxecto que, como remarcou, a Administración galega “está obrigada” a tramitar. Por unha banda, a iniciativa para empregar o oco deixado pola actividade mineira que operou desde principios dos anos 1980 para depositar residuos procedentes de obras está pendente de que se resolva o expediente do propio proxecto de “restauración” e a tramitación ambiental integrada do mesmo.
Como lembrou, a empresa promotora da iniciativa recorreu o informe municipal de Val do Dubra que negaba a posibilidade de implantar esta actividade na antiga canteira ata lograr un fallo en casación que deu a razón á compañía. Ante a demanda da deputada socialista de que o proxecto sexa tombado para evitar que se converta “nunha nova Miramontes ou Casalonga”, Fernández Davila subliñou que a Xunta esixirá o cumprimento da normativa.
