A Xunta deu o paso definitivo para que o proxecto de valorización de residuos de construción previsto no concello de Teo, na parroquia de Cacheiras, continúe a súa tramitación. A Consellería de Medio Ambiente fixo pública a súa resolución de impacto ambiental, na que determina que “non son previsibles” efectos adversos significativos se se respectan todos os requisitos recollidos tanto na documentación presentada pola promotora como nas esixencias establecidas polo propio departamento autonómico.
O procedemento incluíu un período de participación pública, no que se consultaron dez organismos e entidades sectoriais. A información achegada por estes organismos incorporouse á avaliación final e engadiu novos condicionantes ao programa de vixilancia ambiental que rexerá o funcionamento da futura instalación. Entre os ámbitos analizados figuran a protección da atmosfera, a poboación e a saúde, as augas e os leitos fluviais, o chan e as infraestruturas, así como a xestión dos residuos xerados e a integración paisaxística e patrimonial.
Segundo a administración autonómica, os informes recibidos coinciden en que o proxecto “sería viable” no emprazamento proposto sempre que se cumpran estritamente as medidas correctoras e de control establecidas. A resolución detalla, entre outros aspectos, as obrigas vinculadas á prevención de emisións, ao control de ruídos e á protección do patrimonio natural e cultural existente na contorna.
Co informe ambiental favorable xa emitido, a Xunta remitiu a resolución ao órgano substantivo encargado de continuar a tramitación administrativa do proxecto. Ademais, publicou o documento tanto no Diario Oficial de Galicia (DOG) como na web da Consellería de Medio Ambiente e Cambio Climático, último paso do proceso de avaliación antes de que a iniciativa poida avanzar cara á súa autorización definitiva.
