A Romaría de Santa Minia, que se celebra no concello de Brión, conta por cuarto ano consecutivo cun Punto Lila para promover unhas festas libres de violencia machista e garantir a seguridade de mulleres e persoas LGTBIQ+. Segundo informou a concelleira de Igualdade, Rosa Romero, durante as dúas primeiras xornadas non se rexistraron incidentes, polo que o posto funcionou como punto de concienciación sobre a necesidade de que as festas sexan espazos seguros e respectuosos.
Romero indicou que “estas primeiras noites foron tranquilas e as persoas que se achegaron ao posto recibiron toda a información que precisaban”. Os folletos informativos, baixo o lema ‘As festas tamén son nosas’, proporcionaban detalles sobre como actuar en caso de presenciar ou sufrir unha situación de violencia e recomendacións para evitar comportamentos machistas. O Punto Lila permanecerá operativo hoxe durante os concertos de Astarot e Sr Salvaje, de 22:30 a 4:00 horas.
Peche de Romaría
A festa chegará ao seu final mañá, domingo 29 de setembro, cun programa cheo de actividades. O día comezará cos pasarrúas do grupo de gaitas Airiños do Paseo de Colón e a charanga Os Celtas. Ao mediodía, terá lugar a cuarta e última sesión do VIII Festival Monecadas, coa actuación de Títeres Alakrán, que representarán a obra “A Cuba!”, centrada na historia dun galego emigrado a Cuba a comezos do século XX.
Pola tarde, a sesión vermú estará protagonizada por artistas do Festival Brión Inclúe, entre eles a tiktoker Leti da Taberna, co seu espectáculo de narración oral de crítica social feminista, o grupo de batukada inclusiva Iguatuke, e a banda de rock Chungo Pastel, composta por persoas con diversidade funcional. O peche da xornada correrá a cargo do Festival de Bandas de Música, coas actuacións das bandas municipais de Brión e CMUS de Carballo, antes do concerto de Xabier Díaz & Adufeiras de Salitre.
