A celebración do Día Grande de Santa Minia en Brión viviu onte unha xornada destacada pola gran afluencia de romeiros e devotos que acudiron dende diversas comarcas de Galicia, malia o peche parcial da carballeira por motivos de seguridade. A afluencia de xente foi tal que os aparcamentos máis próximos colgaron o cartel de ‘completo’ ao mediodía, durante a misa solemne e á hora do xantar, algo que non se recordaba no último lustro.
As visitas ao santuario comezaron ás 9:00, cunha espera que oscilou entre os 10 e 25 minutos. Milleiros de devotos cumpriron coa tradición de bicar o sepulcro de Santa Minia e depositar as típicas figuriñas de cera. As ofrendas de candeas realizáronse, como en anos anteriores, na casa reitoral.
O tempo acompañou en xeral, agás por algúns chuvascos ocasionais, o que animou a moitos a achegarse á romaría. A pasada noite de xoves, na tirada de fogos artificiais e a verbena das orquestras Los Satélites e Olympus, a parcela dos concertos estivo completamente chea, a pesar dun trebón que afectou ao final da xornada.
O alcalde de Brión, Pablo Lago Sanmartín, destacou o “extraordinario traballo” dos equipos de seguridade e apoio, e guiou á comitiva oficial, composta por diversas autoridades, nun paseo pola carballeira e os postos de venda, antes de participar nun xantar nunha das tradicionais polbeiras.
As festas continuarán durante esta fin de semana con actuacións musicais, pasarrúas e o Festival Brión Inclúe o domingo, que celebrará a diversidade funcional con diversas actuacións, entre elas, a do grupo de rock Chungo Pastel e o concerto de Xabier Díaz & Adufeiras de Salitre.
