Unhas trinta persoas participaron na primeira xornada da Ruta das Hortas, unha nova iniciativa organizada polo Concello de Brión e a asociación Daquí Darredor para poñer en valor o sector primario e promover o comercio de produtos locais e sostibles. O primeiro destino foi a horta de Marisa, en Pedrouzos, onde os asistentes aprenderon sobre as prácticas de produción sostible e a comercialización directa de produtos.
A ruta ten como punto de partida o espazo colaborativo “Transformando en Brión”, situado no terceiro andar do centro comercial Montebalado, desde onde partirán as seguintes visitas, previstas para os días 12, 17 e 24 de setembro, a outras explotacións do municipio.
Esta actividade forma parte dun programa máis amplo que inclúe o Coworking Fest, o 18 e 19 de setembro, e a sexta edición da Feira Labrega, que se celebrará o 22 de setembro no Adro da Igrexa dos Ánxeles. A feira contará con venda de produtos da horta, exposicións de artesanía, obradoiros tradicionais e actividades para toda a familia.
