O Concello de Brión deu comezo esta mañá á súa programación especial arredor do 25 de novembro, Día Internacional contra a Violencia de Xénero, cun obradoiro de autocoidado titulado ‘O descanso da guerreira’, celebrado no centro social polivalente. A iniciativa, conducida pola terapeuta e bailarina Martha Franco, forma parte dun ciclo de cinco sesións que se desenvolverán os próximos martes en horario de 11:00 a 12:30 horas, centradas en técnicas de benestar físico e emocional, como automasaxe, respiración, estiramentos, nutrición ou xestión emocional.
A concelleira de Servizos Sociais e Igualdade, Rosa Romero, explicou que “este ano o programa está centrado en dous obxectivos principais: difundir información sobre os recursos legais, psicolóxicos e económicos dispoñibles para facer fronte ás distintas formas de violencia machista e, por outra banda, poñer o foco na reparación e no encontro entre mulleres de todas as idades”. A participación en todas as actividades é de balde, e as inscricións poden formalizarse no 981 509 910 ou no correo sabela.losada@concellodebrion.gal.
A programación continuará o sábado 8 de novembro coa andaina ‘Camiñamos xuntas!’, un percorrido de 5 quilómetros pensado para mulleres de todas as idades, con saída ás 11:00 horas dende o centro social polivalente. O luns 10, de 16:00 a 18:00 horas, celebrarase o obradoiro ‘Teatro para sandar(nos)’, dirixido pola actriz Diana Sieira, que empregará ferramentas de expresión corporal, xogo simbólico e creación colectiva para promover o empoderamento feminino.
Na semana previa ao 25N, o venres 21 ás 20:30 horas representarase a obra Sophie non é o meu nome de guerra, da compañía Redrum Teatro, centrada na historia dunha muller migrante vítima de trata. A entrada será tamén gratuíta, pero con reserva previa a través de billeteira.concellodebrion.gal.
O luns 24 de novembro, a avogada Cristina Martínez ofrecerá o relatorio ‘Asesoría xurídica sobre violencia de xénero’, de 17:00 a 18:30 horas, cun espazo aberto para resolver dúbidas e explicar os recursos legais dispoñibles.
O día central da campaña, o 25 de novembro, terá lugar na praza do Concello a lectura do manifesto institucional contra a violencia de xénero, ás 12:00 horas, acompañada dunha actuación teatral do grupo Teatro das Maniotas, do IES de Brión. En caso de choiva, o acto trasladarase ao centro social polivalente.
O ciclo pecharase o 1 de decembro cunha nova charla, ‘Asesoría sobre a violencia sexual’, impartida pola psicóloga Lara Fuentes, que abordará como actuar ante situacións de violencia sexual, tanto desde o punto de vista das vítimas como das persoas testemuñas.
