A parroquia de Brión viviu este sábado o Día Grande da Romaría de Santa Minia, unha das citas relixiosas e festivas máis concorridas da comarca compostelá. O feito de coincidir o 27 de setembro en fin de semana multiplicou a chegada de visitantes, con numerosos autobuses procedentes de diferentes puntos de Galicia estacionados á entrada da localidade.
Aínda que a mañá estivo marcada pola choiva e por refachos de vento que coincidiron coa misa solemne, a afluencia non se reduciu. Pola contra, milleiros de persoas agardaron longas colas para entrar no santuario, onde cumpriron cos ritos tradicionais: bicar o sepulcro, pasar as estampiñas pola tumba e deixar figuriñas de cera en forma de membros ou animais, en sinal de petición á santa. A espera media chegou a superar a media hora.
O impacto da choiva tamén se notou nos postos do mercadiño, nos que os paraugas se converteron no produto máis demandado. Preto de 150 tenderetes ofreceron unha ampla variedade de artigos, desde alimentación e artesanía ata antigüidades e obxectos relixiosos.
As polbeiras rexistraron unha asistencia masiva, con colas que chegaban ata a capela e á carballeira, e mantiveron os prezos en 14 euros por ración de polbo ou churrasco. Pola súa banda, as atraccións infantís concentraron numeroso público e mantiveron unha hora diaria de funcionamento sen son para persoas con diversidade funcional. A música correu a cargo de grupos tradicionais e charangas, mentres que o VIII Festival Monecadas achegou espectáculos de títeres ás rúas.
O alcalde de Brión, Pablo Lago, destacou o “extraordinario traballo” de persoal municipal, Protección Civil, Policía Local, Garda Civil e servizos sanitarios para garantir o desenvolvemento seguro da xornada. Acompañado por representantes institucionais como o delegado do Goberno en Galicia, Pedro Blanco, ou o presidente da Deputación da Coruña, Valentín González Formoso, Lago guiou á comitiva oficial antes dun xantar nunha das polbeiras.
As festas continuarán este domingo con pasarrúas, novas actuacións musicais e a representación da compañía francesa Pelele. O concerto de Budiño ás 20:00 horas e a actuación da orquestra Panorama porán o peche á programación.
