O alcalde de Boqueixón, Ovidio Rodeiro Tato, reuniuse con José López Campos, conselleiro de Cultura, Lingua e Xuventude, en San Caetano para tratar varios proxectos de mellora do patrimonio cultural no municipio. Un dos temas centrais do encontro foi o estado do expediente para declarar o Pico Sacro como Ben de Interese Cultural (BIC).
Segundo indicou Rodeiro, o Pico Sacro é “un referente cultural e turístico” tanto para Boqueixón como para toda Galicia. Destacou a súa importancia histórica, ligada ao Códice Calixtino e ao Camiño de Santiago, así como os seus valores xeolóxicos e arqueolóxicos. “A súa singularidade, unha montaña de cuarzo nun territorio granítico, fai que sexa un espazo único que merece ser declarado BIC”, sinalou o alcalde.
Nos últimos anos, o Concello de Boqueixón levou a cabo diversas actuacións para poñer en valor o Pico Sacro, como a demolición dunha estrutura inacabada na subida ao cumio, a substitución da cuberta do depósito municipal por unha vexetal e a limpeza de 3.100 quilos de refugallos nas covas.
Ademais, Rodeiro presentou ao conselleiro proxectos de conservación da Ponte de Ledesma, lugar de relevancia histórica desde os romanos ata a batalla contra as tropas napoleónicas en 1809. O concello organiza eventos como a Noite Velada e a recreación da batalla, que atraen milleiros de visitantes á zona.
