Na noite de onte, o Pico Sacro converteuse nun escenario máxico coa representación do espectáculo musical ‘Camiño Máxico no Pico Sacro’, a cargo da compañía Queiman e Pousa. O evento, que tivo lugar no aparcadoiro do monte en Boqueixón, reuniu a centos de persoas que gozaron dunha actuación ao aire libre centrada nas lendas do Camiño de Santiago e da Raíña Lupa, coa emblemática aparición do dragón do Pico Sacro.
O espectáculo, que mestura teatro, música folk e rock, foi apoiado pola Xunta de Galicia, a través da Consellería de Cultura, Lingua e Xuventude, e polo Concello de Boqueixón. Entre os asistentes destacaron o secretario xeral de Política Lingüística, Valentín García, e o alcalde de Boqueixón, Ovidio Rodeiro, quen afirmou que ‘non hai mellor escenario para narrar estas lendas ca o propio monte sagrado de Galicia‘.
A actuación de onte culminou unha xira que levou a Queiman e Pousa por diferentes localidades galegas, como A Rúa e Ferrol, onde tamén contaron cunha alta participación. O evento reafirma o interese cultural e turístico polo Pico Sacro e as súas historias, que continúan a atraer tanto veciños como visitantes de toda Galicia.
