O vindeiro sábado, 28 de setembro, ás 21:00 horas, o Pico Sacro converterase no escenario do espectáculo “Camiño Máxico no Pico Sacro”, unha creación da compañía Queiman e Pousa, apoiada pola Xunta de Galicia a través da Consellería de Cultura, Lingua e Xuventude. O evento será de acceso libre e gratuíto para todos os asistentes.
Na presentación deste espectáculo, que tivo lugar esta mañá, participaron o secretario xeral da Lingua, Valentín García, o alcalde de Boqueixón, Ovidio Rodeiro, e o Bruxo Queiman, un dos protagonistas da montaxe. Inspirado na contorna máxica do propio Pico Sacro, o espectáculo teatral e musical afonda na lenda do Apóstolo Santiago e da Raíña Lupa, narrando a transformación de Compostela nun faro espiritual de Europa.
O alcalde de Boqueixón, Ovidio Rodeiro, destacou a importancia deste evento para a comunidade local: “Vai ser unha noite máxica; que mellor escenario que o Pico Sacro para acoller este espectáculo que combina teatro e música folk-rock sobre a historia do Camiño de Santiago e as lendas que rodean o noso monte Ilicino”.
