O Concello de Boqueixón comezou as obras de mellora dos accesos ao lugar de Loureda, cun investimento de 68.906,12 euros. Estas intervencións, a cargo da empresa Obras y Viales de Galicia SL, teñen como obxectivo facilitar o acceso e mellorar a seguridade viaria na zona.
Segundo explicou o alcalde de Boqueixón, Ovidio Rodeiro, os traballos inclúen a creación dunha zona formigonada de 480 metros cadrados e unha cuneta formigonada de 205 metros que permitirá unha mellor recollida de augas pluviais. “Ademais, melloraremos con tratamento asfáltico a pista de acceso, o que redundará nunha maior seguridade e comodidade para os usuarios”, indicou Rodeiro.
A maiores, acometerase a limpeza das gabias e salvagabias, e instalaranse tres sinais de Stop para reforzar a seguridade na circulación. Estas melloras forman parte do compromiso do concello por optimizar as infraestruturas locais e facilitar o tránsito diario dos veciños da zona.
