A conselleira de Medio Ambiente e Cambio Climático, Ángeles Vázquez, acompañou esta mañá a un grupo de vinte nenas e nenos de Boqueixón e Santiago durante unha formación na práctica da pesca sostible e sen morte celebrada na área recreativa de Sucira, en Boqueixón. A actividade foi impartida polo catro veces campión do mundo de pesca deportiva David Arcay. No acto tamén participaron a delegada territorial da Xunta na Coruña, Belén do Campo; os alcaldes de Boqueixón e Vedra, Ovidio Rodeiro e Carlos Martínez; e os concelleiros José Luís Mareque, Ángela Conde e Iván Eirís.
David Arcay iniciou a sesión explicando as especies presentes nos ríos galegos, como as troitas e os salmóns no caso do río Ulla, así como as normas para pescalas e a práctica da captura e solta. Arcay ensinou aos nenos a manipular os peixes de forma que non sufran dano antes de ser devoltos aos ríos. Ángeles Vázquez subliñou que esta modalidade de pesca contribúe a manter ou incrementar as poboacións das distintas especies, favorecendo así a continuidade desta práctica deportiva no futuro. Ademais, engadiu que as formacións de Arcay axudan a que os máis pequenos se animen a probar esta actividade e a fomentar a remuda xeracional.
A conselleira agradeceu o labor formativo de Arcay e destacou a colaboración que mantén coa Xunta desde 2018 para promover entre a mocidade os valores deportivos e medioambientais asociados á pesca fluvial. Segundo Vázquez, estas actividades ensinan á rapazada a protexer a fauna ictícola e o medio natural, a practicar a pesca sen morte, a empregar técnicas de captura menos lesivas e a avanzar no coidado e respecto á natureza.
No marco desta colaboración, David Arcay impartirá este ano 16 xornadas divulgativas, das cales 12 serán teóricas e catro teórico-prácticas. Nas sesións, os participantes aprenderán a realizar unha óptima solta dos peixes capturados, coñecerán as canas adecuadas para distintas modalidades de pesca e practicarán con elas nunha completa exhibición de pesca fluvial.
Ángeles Vázquez salientou que estas iniciativas motivan ás nenas e nenos a practicar actividades de lecer na natureza e a realizar boas prácticas que axudan a conservala e protexela. Incidiu na importancia de concienciar aos distintos sectores sociais sobre a relevancia de concibir a pesca fluvial como unha forma de aproveitamento sostible dos recursos naturais, así como de coidado do medio ambiente e dos ecosistemas fluviais. Estas accións chegarán este ano a preto de 340 rapazas e rapaces de entre 12 e 13 anos, sumándose aos máis de 2.000 que participaron desde 2018.
A comitiva oficial tamén aproveitou para saudar a un grupo do Voluntariado Xuvenil do Concello de Boqueixón, que está estes días realizando unha acampada na área recreativa de Sucira. O alcalde Ovidio Rodeiro puxo en valor a solidariedade destes mozos e mozas, “que colaboran na organización de programas de conciliación como o Verán Activo, no que este ano temos a 118 nenos e nenas”.
