A comunidade Fotowalk Galicia celebrará o próximo sábado 22 de agosto unha nova quedada fotográfica en Boqueixón, cunha programación que permitirá aos participantes percorrer distintos puntos do municipio e achegarse ao seu patrimonio arquitectónico, natural e vitivinícola. A iniciativa, denominada ‘Cóñece o Concello de Boqueixón’, conta coa colaboración do Concello de Boqueixón e da marca galega de patacas fritidas Jalys.
A proposta desenvolverase durante boa parte da xornada e combinará os percorridos fotográficos con visitas guiadas, enoturismo e formación. O encontro comezará ás 10:30, coa recepción das persoas participantes e a presentación da camiseta preparada para esta edición.
A primeira parte da mañá estará dedicada a coñecer diferentes espazos relacionados co patrimonio e coa denominada arquitectura do viño. Entre as 10:45 e as 13:30, o grupo realizará unha ruta por varios puntos de Boqueixón que incluirá unha visita guiada á Ponte Ledesma, un dos elementos patrimoniais máis recoñecibles desta zona do río Ulla.
O itinerario continuará polos Viñedos de Donas e chegará tamén ao proxecto de enoturismo María Manuela, onde está prevista unha cata-degustación. Esta última actividade terá un custo de 12 euros por persoa. O percorrido está formulado tamén como unha oportunidade para que os asistentes poidan buscar localizacións e perspectivas coas que retratar tanto a paisaxe como elementos menos coñecidos do patrimonio municipal.
Ás 14:00 está previsto un xantar nun restaurante da zona. Para participar nesta parte da programación será necesario facer reserva previamente.
Xa pola tarde, a actividade trasladarase a outro dos espazos máis destacados da contorna de Compostela. Ás 16:00, os participantes realizarán unha visita guiada ao Pico Sacro, enclave situado no municipio de Boqueixón e visible desde diferentes puntos da comarca compostelá.
A programación concluirá no Centro de Interpretación do Pico Sacro, onde entre as 17:15 e as 17:45 se desenvolverá un obradoiro dedicado á edición de fotografía. A sesión servirá para completar unha xornada centrada non só na toma de imaxes, senón tamén no posterior tratamento do material fotográfico.
A quedada contará ademais coa participación de Jalys, marca galega de patacas fritidas. Como parte da súa colaboración, cada persoa asistente recibirá unha bolsa de patacas da firma durante a xornada.
As persoas interesadas en sumarse ao encontro teñen de prazo ata o mércores 12 de agosto para formalizar a súa inscrición. A solicitude debe realizarse a través do correo electrónico fotowalkgalicia@gmail.com.
