Persoas usuarias da Aula de Estimulación Cognitiva de Agadea Alzheimer en Vedra e do Programa de Prevención da Dependencia de Boqueixón participaron este venres 26 de setembro nun obradoiro gastronómico centrado na filloa de Lestedo, impulsado polo GDR Terras de Compostela.
A actividade desenvolveuse no centro sociocultural de Lestedo e permitiu aos asistentes achegarse á elaboración tradicional das filloas e desfrutar dun showcooking a cargo do cociñeiro José Manuel Mallón, quen amosou diferentes receitas con este produto local como base.
O encontro pechouse cunha degustación que incluíu propostas como filloas con salteado de cabaciño e gambas, canelóns de filloa recheos de Tenreira Galega e filloas flambeadas con augardente de herbas da Ulloa e laranxa.
Ao acto asistiron tamén o presidente da Asociación Cultural da Filloa de Lestedo, José Manuel Canabal; a coordinadora do Programa de Prevención da Dependencia de Boqueixón, María Pereira; e a responsable dos Servizos de Estimulación Cognitiva de Agadea Alzheimer, Lucía Fandiño.
A iniciativa enmárcase na campaña de dinamización turística ‘Terras de Santiago: máis alá de Compostela’, coa que o GDR promove accións inclusivas e de posta en valor da filloa de Lestedo, festa recoñecida como de Interese Turístico Nacional.
