O campo do río de Ponte Ledesma, no concello de Boqueixón, volveu transformarse na tarde deste domingo nun escenario de memoria histórica coa celebración da tradicional recreación da Batalla de Ponte Ledesma. O evento, impulsado polo Concello de Boqueixón, conmemora o enfrontamento que tivo lugar neste mesmo lugar a comezos de marzo de 1809, cando a veciñanza da comarca, organizada arredor da Xunta de Trasdeza, decidiu facer fronte ás tropas napoleónicas que avanzaban cara a Santiago de Compostela.
A actividade contou coa dirección do actor Suso Martínez e do músico Manoele de Felisa, quen foron os encargados de guiar ao público a través dos feitos históricos, explicando os detalles deste episodio singular da resistencia popular galega contra a invasión francesa. Un relato que subliña a entrega da xente común nun momento clave da Guerra da Independencia, onde, segundo recollen fontes da época, “só quedaron na casa as crianzas, os vellos e as persoas enfermas”, mentres o resto da poboación se armaba con ferramentas agrícolas, paus e pedras para enfrontar ao exército máis poderoso do momento.
A escenificación incluíu diálogos dramatizados, ambientación musical en directo e a implicación de veciños e veciñas de Ponte Ledesma, que se prestaron a dar vida aos personaxes históricos da contenda. O acto non só serviu para recuperar un feito histórico, senón tamén para reforzar o vínculo entre memoria colectiva e identidade local, incorporando a participación cidadá como eixo central da proposta.
O concelleiro de Turismo de Boqueixón, José Luís Mareque, quixo agradecer “o traballo da Consellería de Cultura, das persoas de Ponte Ledesma e do equipo artístico implicado” na posta en escena dun evento que se consolidou como unha cita anual coa historia do territorio. A recreación da batalla forma parte do programa de actividades culturais e turísticas que o Concello promove para dinamizar o patrimonio e ofrecer alternativas de lecer con sentido histórico.
A Batalla de Ponte Ledesma, aínda que pouco coñecida fóra do ámbito comarcal, representa un dos múltiples episodios de resistencia civil contra o dominio napoleónico en Galicia. A súa recuperación e difusión a través deste tipo de iniciativas constitúe un exercicio de memoria viva, no que a tradición oral, a teatralidade e a música se mesturan para transmitir á cidadanía a importancia de feitos que marcaron o destino da súa contorna.
