O Castelo do Pico Sacro, situado no cume do Monte Ilicino, foi o escenario principal da segunda semana do campo internacional de voluntariado ‘Monte Sacro’, que este venres chegou ao seu remate. Ao longo de dúas semanas, quince persoas de entre 18 e 30 anos, procedentes de Madrid, Estremadura, Francia, Eslovaquia e outras rexións, participaron nesta iniciativa de recuperación patrimonial impulsada polos Concellos de Vedra e Boqueixón, en colaboración coa Dirección Xeral de Xuventude, Participación e Voluntariado da Xunta de Galicia.
Os traballos centrados no Pico Sacro tiveron como obxectivo a limpeza e posta en valor do antigo alxibe da fortaleza, unha estrutura de orixe medieval directamente escavada na rocha. Con preto de catro metros de altura e unha capacidade de ata 65.000 litros de auga, esta cisterna constituía un elemento clave para a resistencia de calquera guarnición durante os conflitos da Idade Media. Segundo as fontes históricas, o castelo foi construído no século XII por orde da raíña Urraca de León, nun momento de tensión bélica co arcebispo compostelán Diego Xelmírez.
Ademais do alxibe, na zona aínda se conservan outros restos arquitectónicos da fortificación, como tramos da escaleira de acceso e muros defensivos, que foron tamén obxecto de limpeza e sinalización ao longo da intervención.
A primeira semana do campo estivo centrada en tarefas de eliminación de especies vexetais invasoras na contorna de San Xoán da Cova, no municipio de Vedra. Esta paraxe, situada á beira do Ulla, acolle unha ermida de orixe medieval vinculada tamén ao camiño xacobeo e ao patrimonio relixioso da comarca.
