O Pico Sacro, un dos puntos máis emblemáticos e elevados do concello de Boqueixón, acolleu na tarde-noite do martes unha nova edición das Noites Astronómicas, unha actividade anual que organiza o Concello de Boqueixón en colaboración co Observatorio Astronómico Ramón María Aller da Universidade de Santiago de Compostela. Máis dun centenar de persoas participaron nesta cita de carácter gratuíto, que combina divulgación científica, natureza e patrimonio.
O evento contou cunha meteoroloxía favorable, con temperaturas suaves e un ceo totalmente despexado, o que, unido á práctica ausencia de contaminación lumínica na contorna do Monte Ilicino, facilitou unhas condicións óptimas para a observación astronómica. O propio alcalde de Boqueixón, Ovidio Rodeiro, destacou o éxito da convocatoria e animou a veciñanza e visitantes a continuar explorando o Pico Sacro durante o verán, ben a través das visitas guiadas de fin de semana, ben participando na próxima actividade do programa Correntes do Ulla.
Esta última, titulada ‘Ruta polo patrimonio oculto de Boqueixón’, terá lugar o sábado 17 de agosto entre as 10:30 e as 13:30, e incluirá un percorrido guiado pola contorna do Pico Sacro. A iniciativa está organizada polos concelleiros de Boqueixón e Vedra e é tamén de acceso libre para o público.
Durante a sesión astronómica, o público puido identificar a simple vista distintas constelacións grazas ás explicacións do catedrático emérito de Astronomía e Astrofísica da USC, José Ángel Docobo, quen dirixiu a actividade e achegou ao público ao coñecemento do ceo nocturno. A continuación, a observación continuou mediante dous grandes telescopios desprazados ata o lugar polo equipo do Observatorio, que permitiron contemplar en detalle corpos como a lúa, a estrela polar ou a osa maior.
As Noites Astronómicas 2025 forman parte dun programa máis amplo de divulgación científica e posta en valor do patrimonio natural, impulsado polo Concello de Boqueixón e a USC, con apoio da Xunta de Galicia, o Ministerio de Ciencia e Innovación e outras entidades como Óptica Val.
