O Concello de Boqueixón anunciou este martes unha programación especial para o verán de 2025 centrada no Pico Sacro, o enclave máis emblemático do municipio, que acollerá actividades culturais e de divulgación co obxectivo de promover o seu valor patrimonial, paisaxístico e lendario. A iniciativa estrela será o concerto que o músico Carlos Núñez ofrecerá o 30 de xullo ás 20:00 no cumio do monte, dentro da súa xira Lugares máxicos 2025.
Segundo informou o alcalde Ovidio Rodeiro, este evento suporá “un concerto único e irrepetible nun dos lugares máis máxicos e lendarios de Galicia”. As entradas están xa dispoñibles na web do artista (www.carlosnunez.com) a un prezo de 23 euros, con IVE e gastos incluídos. A actuación, que servirá como colofón da xira, pechará unha rolda de concertos en espazos patrimoniais como o Pasatempo de Betanzos, a Colexiata do Sar ou o Mosteiro de Oseira.
A proposta musical completarase cun programa de visitas guiadas gratuítas ao Pico Sacro, que se desenvolverá todos os venres, sábados e domingos desde xuño ata o 14 de setembro, con tres quendas diarias ás 12:00, 16:00 e 18:00 horas. As persoas participantes coñecerán os mitos, a historia e as vistas privilexiadas deste lugar, que permite contemplar a Catedral de Santiago nos días despexados. A actividade, de aproximadamente hora e media de duración, require inscrición previa a través do teléfono 981 513 061 ou o correo electrónico boqueixonturismo@gmail.com.
Como parte do programa estival, o Concello impulsa tamén dúas edicións especiais denominadas ‘Atardeceres no Pico’, previstas para os venres 4 e 11 de xullo ás 20:30 horas. Estas sesións combinarán a explicación das lendas celtas asociadas ao monte ilicino cunha experiencia visual ao aire libre durante a posta de sol. O punto de encontro para todas as actividades será o apartadoiro do Pico Sacro, e as prazas serán limitadas tamén nestes casos, polo que se esixe reserva previa.
Estas accións forman parte dunha estratexia máis ampla de valorización do territorio, que se suma á condición de Boqueixón como un dos concellos con maior número de festas de interese turístico de Galicia, entre as que destacan o Entroido dos Xenerais da Ulla en Sergude, a Festa das Carrozas do San Cidre no Oural e a Festa da Filloa de Lestedo, esta última con recoñecemento a nivel estatal.
