O Concello de Boqueixón vén de presentar unha denuncia ante a Garda Civil tras detectar o hackeo de dúas liñas de telefonía móbil municipais: a do alcalde e a da directora do CRA ‘Neira Vilas’. Segundo a información facilitada polo propio consistorio, as liñas foron empregadas por persoas descoñecidas para enviar mensaxes de WhatsApp solicitando cartos a distintos veciños e veciñas da localidade, o que podería constituír un delito de suplantación de identidade e intento de estafa.
Desde o Concello aclaran que non utilizan a plataforma WhatsApp para realizar xestións económicas nin para solicitar pagos por ningún servizo, polo que fan un chamamento urxente á cidadanía para que ignore calquera mensaxe sospeitosa recibida nas últimas 24 horas desde eses números e, sobre todo, que non realice ningún tipo de transferencia, pago por Bizum ou outra operación económica.
O goberno municipal lamenta os prexuízos e a alarma causados e sinala que está a traballar para recuperar o control das liñas afectadas nas próximas horas, ao tempo que confía en que a investigación aberta pola Garda Civil permita identificar e deter á persoa ou persoas responsables do ataque.
O Concello reitera a súa disposición para colaborar coas autoridades policiais e lembra que ante calquera dúbida ou recepción de mensaxes sospeitosas, a veciñanza debe poñerse en contacto directamente co consistorio polos medios oficiais habituais, evitando así caer neste tipo de fraudes.
