O Concello de Boqueixón vén de licitar o proxecto de mellora de varios camiños e accesos en diferentes puntos do termo municipal. A actuación, que leva por título ‘Mellora de camiño en Burgo-Lamas e outro’, conta cun orzamento total de 32.168,20 euros e permanecerá aberta á presentación de ofertas ata o 22 de abril.
O obxectivo da iniciativa é optimizar a mobilidade rural e a seguridade viaria nos núcleos afectados. As intervencións están repartidas en catro aldeas e dous camiños pertencentes ás parroquias de Lamas, Pousada, Codeso e Ledesma.
Concretamente, o proxecto contempla a mellora dos accesos ás aldeas de Manlle (Lamas), Eirexe (Pousada), Santaia e Casalvieito (Codeso). En todas estas localizacións prevese a reparación previa de fochancas e o posterior tratamento asfáltico superficial con rego de selado, actuacións que abranguen unha superficie conxunta de 1.740 metros cadrados.
Ademais, inclúese a intervención nun camiño no lugar de Burgo (Lamas), cunha lonxitude de 140 metros e un ancho de 3,5 metros. Neste caso, a actuación será executada en zahorra, cun traballo previo de acondicionamento e saneo mediante pedraplén.
No caso do camiño en Baiuca (Ledesma), a intervención abarca un tramo de 395 metros de longo e 5,5 metros de ancho, onde tamén se aplicará un tratamento asfáltico superficial e rego de selado. Esta mellora inclúe, ademais, unha zona de 150 metros cadrados en forma de abanico.
Estas actuacións forman parte da estratexia do goberno local para reforzar as infraestruturas viarias do rural, facilitando así o tránsito de vehículos e mellorando a calidade de vida da veciñanza destas parroquias. O Concello anima ás empresas interesadas a presentar as súas ofertas antes da data límite establecida.
