A Axencia Galega de Desenvolvemento Rural (Agader) e o Concello de Boqueixón mantiveron unha reunión este xoves para avaliar medidas relacionadas co desenvolvemento rural do municipio e a posta en marcha de mecanismos para a cesión de parcelas agrarias. O encontro contou coa participación da directora xeral de Agader, Paz Rodríguez, do alcalde de Boqueixón, Ovidio Rodeiro, e do concelleiro de Servizos e Obras Públicas, Manuel Fernández Munín.
Un dos puntos centrais da reunión foi a análise da utilidade do Banco de Terras de Galicia en Boqueixón. Esta ferramenta, xestionada pola Xunta, busca evitar o abandono das parcelas agrarias e poñelas a disposición de persoas interesadas en usos agrícolas, gandeiros, forestais ou de conservación do patrimonio natural.
Durante a xuntanza, Paz Rodríguez destacou a importancia deste mecanismo, lembrando que o Banco de Terras está pensado para facilitar o acceso á terra a quen desexe poñela en produción e para evitar a degradación das parcelas en desuso.
O alcalde, Ovidio Rodeiro, subliñou que o Concello de Boqueixón traballa para impulsar o aproveitamento das terras agrarias dispoñibles no municipio, co obxectivo de dinamizar o sector primario e mellorar as oportunidades para agricultores e gandeiros da zona. Pola súa parte, Manuel Fernández Munín, concelleiro de Servizos e Obras Públicas, indicou que se analizarán as posibles accións de colaboración co Banco de Terras para facilitar a xestión e uso efectivo das parcelas dispoñibles.
