O CPI Antonio Orza Couto de Boqueixón culminou un importante proceso de rehabilitación integral que supuxo un investimento de máis de 800.000 euros por parte da Xunta de Galicia. O conselleiro de Educación, Ciencia, Universidades e FP, Román Rodríguez, e o alcalde de Boqueixón, Ovidio Rodeiro, visitaron este luns as renovadas instalacións, acompañados pola delegada territorial da Xunta na Coruña, Belén do Campo, e outros representantes municipais e educativos.
O alcalde Ovidio Rodeiro destacou que este proxecto supón “o maior investimento realizado no CPI Antonio Orza Couto nos seus máis de 50 anos de historia”. Construído en 1970, o centro conta agora con melloras significativas que foron ben recibidas pola comunidade educativa, tal e como os propios estudantes transmitiron durante o último pleno infantil. Rodeiro aproveitou a visita para presentar proxectos municipais dirixidos a mellorar a mobilidade na contorna do centro, beneficiando tamén ás instalacións deportivas e sanitarias próximas.
Román Rodríguez enmarcou a actuación dentro do Plan de nova arquitectura pedagóxica da Xunta, que impulsa a modernización e sustentabilidade medioambiental nos centros educativos galegos. “Estamos a renovar cubertas, illar fachadas e instalar novas fiestras e luminarias, garantindo maior eficiencia enerxética e confort para a comunidade escolar”, explicou o conselleiro.
DETALLES DA REHABILITACIÓN
No CPI Antonio Orza Couto realizáronse melloras como o illamento térmico das fachadas e renovación dos falsos teitos, instalación de luminarias LED e tarefas de pintura en Infantil e Primaria, a substitución da cuberta de tella orixinal por unha de panel sandwich no edificio de Primaria, cambios nas fiestras e melloras nos canos do comedor escolar e a creación dun acceso cuberto ao edificio de Infantil mediante unha pérgola metálica, que facilita o acceso en días de chuvia.
Estas medidas permitirán un aforro enerxético do 50% no edificio de Primaria e do 34% no de Infantil, reducindo o consumo enerxético e as emisións de CO2.
Esta intervención súmase a outras realizadas pola Xunta nos últimos anos. En 2019 investíronse 48.000 euros no cambio da cuberta, e en 2016 destinaron 60.000 euros á substitución de fiestras, canalóns e baixantes para evitar humidades.
