O Concello de Boqueixón comezou as obras de mellora da eficiencia enerxética no pavillón polideportivo do Forte, cun investimento próximo aos 60.000 euros. O financiamento procede da Xunta de Galicia, a través do fondo adicional ao Fondo de Cooperación Local. O alcalde de Boqueixón, Ovidio Rodeiro Tato, e o concelleiro de Obras, Manuel Fernández Munín, asistiron ao acto de replanteo das obras, acompañados por representantes da empresa adxudicataria.
Rodeiro Tato explicou que, ademais de mellorar a eficiencia enerxética, as obras solucionarán os problemas de humidades no interior do polideportivo, producidos por gretas e fisuras nas fachadas exteriores. Entre as actuacións previstas están a reparación das zonas máis afectadas, a instalación dun novo revestimento con solución SATE e a substitución dos remates de coroación e da cuberta para unha correcta evacuación da auga da chuvia.
Outra das melloras incluídas no proxecto é a instalación dun equipo de produción de auga quente sanitaria nos vestiarios, que contará cun sistema de bomba de calor por aerotermia e un acumulador de 477 litros, o que aumentará o confort dos usuarios das instalacións municipais.
