O antigo campo de fútbol de Ortoño está a piques de estrear unha nova vida grazas ás obras de rexeneración que se están a levar a cabo. O proxecto, adxudicado á empresa MERAKI CR SL por un importe de 268.155,30 euros (IVE incluído), inclúe a creación dunha pista de patinaxe e dunha explanada para eventos. Segundo indicou o alcalde de Ames, Blas García, trátase dunha actuación que “fará do vello campo un recinto versátil, preparado para unha multitude de eventos e actividades”.
Esta semana, o alcalde visitou as instalacións acompañado polo concelleiro de Obras e Servizos Básicos, Gustavo Nieto, e pola concelleira de Deportes, Susana Señorís, entre outros representantes municipais e veciñais. García subliñou que Ames, ao ser “o concello máis novo de Galicia e o único que medra”, ten unha demanda crecente de espazos deportivos e culturais, á que este proxecto busca dar resposta.
Pola súa banda, Susana Señorís destacou que esta obra se suma ás recentes melloras nos pavillóns polideportivos e ao investimento realizado no campo de lanzamento de Ventín, co obxectivo de ofrecer á veciñanza as infraestruturas deportivas que demanda.
As obras están na súa fase final e inclúen, ademais da pista de patinaxe, unha explanada asfaltada que poderá ser utilizada para eventos, feiras e cursos de seguridade viaria. Esta zona complementarase coa mellora do acceso ao recinto, a instalación dunha nova liña de alumeado e conexión de auga nos antigos vestiarios, así como a substitución das carpinterías exteriores.
O proxecto de Ortoño súmase a outras actuacións recentes no concello, como o novo campo de lanzamento en Biduído.
