O Concello de Ames presentou hoxe a nova programación de actividades da Aula Municipal Tecnolóxica da Información e da Comunicación do Milladoiro (AMTIC), que se desenvolverá durante os meses de outubro, novembro e decembro. O anuncio fíxose nun acto celebrado na Casa da Cultura do Milladoiro, onde o alcalde de Ames e concelleiro de Tecnoloxías da Información, Blas García, destacou a importancia desta oferta formativa para mellorar as competencias dixitais da veciñanza.
A técnica responsable da AMTIC, Almudena Caamaño, explicou que se busca “ofrecer actividades tanto para adultos como para menores, con diferentes temáticas que atraian a diversos sectores da poboación”. Entre as principais novidades, Caamaño subliñou os cursos de preparación para a obtención da Certificación Galega de Competencias Dixitais (COMDIX), que buscan mellorar a preparación dos participantes de cara á proba.
Estefanía Muíño, de Estudios Rafer, entidade encargada da xestión das actividades, sinalou que a formación é un importante recurso de conciliación para as familias, ademais de facilitar o acceso ás instalacións da AMTIC.
A programación inclúe cursos de alfabetización dixital en diversas parroquias de Ames, como Agrón, Tapia, Augapesada e Ortoño, ofrecendo un total de 108 prazas. Tamén haberá cursos para nenos e adultos na propia AMTIC, incluíndo temáticas como a administración electrónica e as compras seguras en internet.
As inscricións están abertas ata o 16 de outubro e pódense realizar a través do enderezo informatica.milladoiro@concellodeames.gal ou no teléfono 674 594 843.
