Ames Radio abre, un ano máis, o prazo para que a cidadanía, asociacións e entidades presenten propostas para a creación de novos programas na emisora. Desde hoxe e ata o 30 de setembro, as persoas interesadas poden enviar a súa ficha de solicitude ao correo electrónico radio@concellodeames.gal, presentando proxectos de temáticas diversas que resulten de interese para o municipio amesán ou que estean protagonizados por residentes, nados ou traballadores de Ames.
A convocatoria está aberta a maiores de 18 anos, ou de 16 anos cun titor responsable. Cada proposta debe incluír detalles como o título, obxectivos, público destinatario, duración e día de emisión suxerido. Ames Radio proporcionará o equipamento técnico necesario e o seu espazo físico para a gravación dos programas seleccionados.
Desde a súa creación en 2017, o proxecto de Radio Cidadá xa ten materializado máis de corenta programas, enriquecendo a grella de contidos con espazos sobre literatura, música, ecoloxía e historia local, entre outros. Para máis información, os interesados poden contactar con Ames Radio a través dos seus correos e teléfonos dispoñibles.
